लमजुङ, २७ कार्तिक । जिल्लाको बेसीशहर नगरपालिका ८ स्थित नारायणस्थान चोकमा यात्रुहरुका लागि विश्रामस्थल निर्माण गरेको छ । नारायणस्थल टोल विकास संस्थाको पहलमा यस नगरपालिकाको २ लाख र स्थानीयहरुका २६ हजार बराबरकोे जनश्रमदानबाट डिजिटल बोर्ड सहितको विश्रामस्थल निर्माण गरिएको हो ।
नवनिर्मित विश्रामस्थलको विहीबार नगरप्रमुख गुमानसिंह अर्यालले उद्घाटन गर्दै नगरकै नमुना र पहिलो विश्रामस्थल रहेको र यसले यात्रुहरुका लागि ठुलो सहज बनाउने बताउनुभयो । नगरमा अझै धेरै काम गर्न आवश्यक रहेको र विकास तथा काम गर्न सक्ने क्षमता नगरका नेतृत्वमा नभएर होइन आर्थिक अभावले काम गर्न नसकिएको उहाँको भनाई छ । उहाँले भन्नुभयो, स्थानीय तह बलियो बनाउनका लागि संघ र प्रदेश सरकारले स्थानीय तहलाई पर्याप्त बजेट उपलब्ध गराएर बलियो बनाउनुपर्नेमा जोड दिनुभयो ।
त्यस्तै, वडाअध्यक्ष पवित्रा थापामगरले नगरको मात्र नभई जिल्लाकै उदारणिय र राम्रो विश्रामस्थल रहेको र वडाका अन्य स्थानमा समेत यस्ता विश्रामस्थल आवश्यक छ आगामी दिनमा हाम्रो ध्यान केन्द्रित हुने उहाँले भन्नुभयो । वडामा स्थानीय सरकार आएदेखि विभिन्न विकास भएको समेत उहाँले बताउनुभयो । सो संस्थाका अध्यक्ष बालकृष्ण श्रेष्ठले भन्नुभयो, यहाँ यसअघि यात्रुहरुका लागि विश्रामस्थल नहुँदा घाम पानीमा निकै समस्या झेल्नुपर्ने बाध्यताको अन्त्य भएको छ । उहाँका अनुसार यस स्थलमा १२ जना यात्रुहरुले एकै चोटी विश्राम गर्नका लागि अट्ने भएका छन् ।
जिल्लाकै मुख्य बजार बेसीशहर बजारको चोकमा रहेको यस विश्रामस्थल निर्माणले स्थानीय हर्षित भएका छन् । जस्तापाता राखिएको छानो छ भने, यात्रु बस्ने ठाउँको समेत व्यवस्था गरिएको छ ।
आफ्नो प्रतिकृया दिनुहोस्